Ritorna

E MI TREBB

un trebbo

Adèss e mi Trèbb un n'è gnént:
L'è sôl una ca' bandunèda.  
Puté turnè indrìa d'zinquènt'ànn
t'avdrést a la séra,
 a e spràj d'una lôma a petrôli
int e nìr dla cusèna,
una vècia ch'la fìla la cànva
invrucéda int la rôcca,
 ch'la s'spuda int al dìdi
 sécchi, rôvdi, indulìdi,
a fôrza ad frulé tôrna e fùs,
 a fôrza ad tiré 'te cavèçç...

 O nòna, o pôra Santèna!
 T'n'è guàst dal manèli,
 t'n'è fàtt 'na gran màssa d'chi fùs,
 di canéll e di ghèfal,
t'n'è 'vù dla pazìnzia
a tèss tött chi tìl,
a imbianchèj cun la zèndra
e cun l'aqua bulìda,
a stèndi m'e sôl,
ma la guàza!
E intènt che t'filéva
t'cuntèva la fôla de gàtt
che l'andèva a la véggia:

"Par strèda e gatìn e cantèva:
 "e paréva ch'l'andèss a la fèsta,
 "u s'éra lissé tött e pél,
"u s'èra pitnè la cudìna:
"Talalô, talalô, talalô
 "L'arvéva cuntènt e inligrì
"a ca' dla murôsa
"e pö u la ciamèva:
"Manghèna! Manghèna!
 "E lìa, cun la vôsa un pô bàssa,
 "la i géva da drìa la battiôla:
 "L'è ancôra sö i mì,
 "l'è ancôra sö i mì!
 "E pôvar gatìn scunsulè,
 "a côda bàssa,
 "e turnèva vérs ca'
 "e u s'lamantèva:
 "La n'm'ha vlù,
 "la n'm'ha vlù....
 "E l'andèva a durmì 't la cantèna".

"O nòna," mé a t'géva,
"racòntumla ancôra!"
E vènt sö pr'e bùs de camén
e mugiéva....
 E nòn e raviéva la brèsa,
 e spustèva i cavdùn
e l'alzèva la fiàmba
e dòp, s'un batèch infughì,
e zandéva la péppa
e da sòtta e ridìva....

Adèss e mi Trèbb un n'è gnént:
l'è sôl una ca' bandunèda
parò, tra chi sàss ramassé,
u j éra du véçç törna e fùgh,
u j éra un burdèll ch'u s'ccaldèva!