Ritorna

E VANGÉLI SGOND A MÉ

Predicaziòn

    L'éva détt a la zènta:
    "A v'zùr sôra e mi Ba,
    e a vöj che tött i m'sènta,
    che ad stì sgnurùn ch'è qua
    ad dèntra e Paradìs
    u n'j è nissùn ch'a i va."
    E pöpul l'ascultèva
    quel ch'géva e Nazarén
    e quante Lò e parlèva
    tött i batéva al mèn.
    Sôl i sgnùr i tarmèva:
    par lô' u n'scurìva bèn.

    E par l'ès piö precìs,
    ch'u ni föss malintìs)
    e purtè un paragòn
    ch'j arvanzè tött ad giàzz:
    "L'è piö fàzil, puràzz,
    che un camèl de desért
    e pàssa int e bùs vért
    d'un ègh da mataràzz
    che un ad sti sgnuràzz
    e vàga in Paradìs
    par tött l'eternità.
    E sicòm la nn'è giösta
    che i prìt i mercantèzza
    dèntra la Chèsa ad Dio
    al Tèvuli dla Lèzza:
    a v'zùr prôpi dabòn
    ch'a ciàpp int una frösta
    e a i dàgh una leziòn!"
    Acsé, tött quènt la zènta
    i curìva a santìl:
    j öman cun la sperènza,
    i véçç par banadìl,
    e cal dòni, int e vdél
    acsé bèl e zantìl,
    al pighìva i su znöçç,
    i burdéll i s'spicèva
    int e cèr di su öçç...

    Par un pôpul cmè quéll,
    pìn ad fèma e d'miséria,
    cun i sgnùr ch'i l'sfrutéva,
    cun i prìt ch'i l'udièva,
    un Signôr che dscuréva
    ad amôr, d'fratelénza
    l'éra un gran vénimént,
    l'éra un fìl ad sperènza
    par un quèlch cambiamènt.

 Passiòn

    « Na matèna d'Avrìl
    quant l'antrè 't la Zità
    a cavàl d'un sumàr,
    tött e pôpul quant'l'éra
    u  l'purtètt in triònf
    e parfìna la séra
    i durètt a rugié:
    « Viva Crést, Bàss i prìt,
    Viva Crést, Bàss e Rè,
    Bàss i sgnùr, Viva Té! »

    Int al chèsi di sgnùr,
    int la règgia de Rè,
    j éva ciàpp i dulùr,
    j éva cmènz a tarmè.
    Nènca i prìt j éva ciàpp
    una gran tarmarèla
    e j avéva una fìfa
    ch'u l'sa la mastèla!
    I pansèva tött quènt:
    « Se e pôpul l'ha rött,
    la va fnì che ste Crèst
    u z'fa föra ma tött ».
    Da che dé ij la zurè,
    e i tachè a caluniél,
    e j andè dai purétt
    a cmanzèj a dì d'mèl.
    E sicöm chi cnuséva
    l'ignurènza dla zènta,
    in puch dé j arivètt
    a fè quéll ch'j éva détt.
Parchè bsögna savè
    che ènca alôra, cmè ozzdé,
    piö busìj ta i dì,
    piö la zènta la t'créd:
    l'è un bisögn ch'l'è sintì
    quéll ad créd in quèlch quèll,
    specialmént pö s'u n's'véd,
    tènt e piö s'l'è irreèl.

Fat e sta che una séra
    Gesö Crést u s'n'adè
    ch'u j avéva tött còntra
    e u n'savéva e parchè:
    L'éva còntra la Cìsa,
    l'éva còntra i purétt,
    l'éva còntra j amìgh
    ch'i l'guardèva in suspètt;
    e int e zìr d'l'amicizia,
    u n'j è bsögn gnènca ad dìl,
    u j éra un s'la malìzia,
    ch'léra prònt par tradìl:
    e la séra piö brötta
    ch'i l'purtèva a e mazzèl
    sènza inciùna vargôgna,
    l'étt curàgg ad basèl!...

Acsé Crést e finétt
    int al mèni di Bôja,
    chi l'armnè in tött i mùd
    cmè u s'arména la spôja,
    ij dasé un sac ad bòti,
    i l'insté da pupàzz,
    il purtè avènti e pôpul
    arviné cmè un sangvnàzz
    e cla zènta che prèma
    la l'avéva indurè
    l'éra dvènt una bélva,
    l'éra un brènch d'sciagurè.
    Cumè un brènch d'animèli
    i rugìva a gran vôsa
    ch'il duvéva mazzè
    cruciféss int la crôsa.

    Fina quànd ch'i n'pruvè
    ènca l'ùltum martìr,
    fina quànd ch'i n'sinté
    tiré l'ùltum suspìr,
    i j un fàsé d'ogni ràzza,
    i l'cmanzètt a tö in zìr,
    i j spudètt int la fàzza
    e cmè bess-ci immatìdi
    i l'impìva ad ferìdi.
    U j fö nènch un vigliàch
    (che dà sgöbit ancôra)
    ch'u i cazzè una curtlèda
    ch'l'éra mört 'lôra 'lôra.
    E Lò, intènt che murìva
    e un n'avéva piö fiè
    e parghèva e su Ba
    ch'u j avéss pardunè.

 Resureziòn

   Té, Signôr, t'é fàtt bèn
    a fè tött quèl t'é fàtt,
    e pö te ta l'savéva
    che  e tu Ba u t'arvivéva:
    parchè dòp, par tri dé,
    cum la è, cum la nn'è,
    u s'scurè tött e zìl,
    al muntàgni al tarmè
    e una bèla matèna
    t'arturnè cumè prèma.

    Ma da quànt t'cì mört Té,
    ch'l'è doméla  e piö ànn
    u j n'è mört ad chi crést
    sötta i pìa di tiànn!
    E no t'créd che i turmènt
    t'jépa pàss adchè Té,
    u n'j è bsögn ch'a te dégga,
    Gesö Crést, Te ta l'sé:
    egoésta e ignurént
    i n'ha fàtt di mazéll,
    cun e sàngv di purétt
    j ha inlurdè tött gniaquèll
    e i delétt e al turtùri
    al cunténua ènca adèss
    e u s'amàzza la zènta
    par che spôrch dl'intarèss.

    L'éra mèj se cla vôlta
    T'la faséva finìda,
    se ma tött cla zantàzza
    ta l'avéva punìda!
    Se ogni vôlta che un öman
    l'assasséna un fradèl
    ta l'faséss murì söbit
    prèma ch'l'élza e curtèll!
    Se ogni vôlta che nàss
    un s-cianàzz dilinquént
    ta l'faséss andè d'bòta
    int e mèzz de campsént!

    Ma sicöm t'cì tròp bòn
    'sti lavùr ta ni fé.
    ...A farém da par nun,
    se ta z'dé e tu paré:
    còntra l'ôdi, la guèra,
    còntra al jéni e i leùn,
    a unirém al nòst fôrzi,
    a n'farém piö i quajùn
    E se lôr i s'intènd
    ad mandèz a l'arvèna...
    ...e si vô de nòst pèl...
    i z'darà dla su lèna!