Ritorna

LA BEFANA

O pôra Befàna ad tènt ànn indrìa,
 ad fàta miséria t'avéva ènca té!
 T'purtèva un stidàzz tött quènt cunsumé
 e t'daséva la ròba s'na gran caristìa.

T'avéva paura d'svigè chi pör fiùl,
t'antrèva pianìn zö pr'e bùs de camén,
 parchè s'i t'dmandeva un reghèli da s-cién,
 u t'rastèva t'e sàc sôl du tri cuciarùl,

 dö tre melarènzi, i figh mandurlé,
e un pögn d'caramèli ad quìli ch'raspèva,
ch'u i vléva e martèll par putéli machè.

T'impìva al calzétti e pö ta t'n'andèva,
in silènzi, d'nascòst, cöm s't'andèss a rubé
e t'sparìva cunfùsa int e frédd e int la néva.