Ritorna

PAR LA TÙ LIBERTÀ

Se una brötta matèna
  ta t'avéss da svigè a l'impruvìsa,
  cun al ràfichi sèchi di mìtra,
  cun i scöppi dal bòmbi
  chi t'spàca la tèsta,
  cun i rögg spavantè
  dal pôr dòni,
  cun e piènt disperè
  di burdéll
  e t'avdéss int al strèdi
  scarriulè i carrarmè
 e tött quènt la Zità
  inglupéda int e föm
  e int al fiàmbi...
  Se t'avdéss triunfè
  j assassèn e al spiàzzi
  e scanè i galantöman
  ins al pörti dal ca'...
  E vrébb dì zertament
  che sarébb arivàt
  e piö brött di destèn,
  ch'a saréssm a la fèn
  par la tu Libertà.

Se una quèlca matèna
 ta t'avéss da svigè
 cum ta t'svégg tött i dé:
 cun i prézz ch'j è carsù,
 cun i böch
 ch'i nn'è bun da fè gnént,
 cun la zènta ch'lavôra
 vilìda, scuntènta,
 par la vita
 ogni vôlta piö chèra
 par l'avnì malsicùr,
 cun i sgnùr
 che j è sèmpra piö sgnùr,
 e s't'vì al spìj e i magnàzza
 no fè gnént tött e dé
 e chi t'rìd int la fàzza
 parchè t'vé a lavurè...
 E s'ta t'lémit soltènt
 a vdé al côsi ch'a n'va,
 sènza fè un azidént,
 sènza un pö d'volontà
 ad cambì l'andamént:
 e vô dì
 che t'é pôch da sperè
 par la tu Libertà.