Ritorna

TIFO E .... CULÉR
CAMPIONATO DI CALCIO - SERIE A
Anno 1974 - 1975  Campanilismo

L'è finì e Campiunè,
i tifus dla Romàgna
i z'ha dè e côr e fiè,
la zità, la campàgna,
paìs dla culèna,
    al casìni d'muntàgna,
al fraziòn dla  marèna,
i faséva svantlè
cun orgöj e fierèzza,
par la nòsta salvezza,
culùr de Cesèna.

Quànt l'avnìva chi dé
i s'svarsèva int e Stadio,
i s'mitìva d'isdé,
i zandìva la radio
e i s'gudìva tött quènt
a fè e tifo par nùn:
l'éra quìj ad Ravènna,
ad San Mèvar, ad Cas-ciùn,
quìj d'Arzùn,d'San Marèn,
ad Bartnòra, d'Furlé,
ad Marchè Sarasén,
j éra d'Fènza, d'Midgèna,
j éra d'Lugh, ad Frampùl...
tött i s'dèva da fè
par sustné e nòst Cesèna:
parchè a sàm Rumagnùl!...

Solamènt i Rimnìs
i z'ha dè da capì
chi éra prôpi decìs,
ch'i n'z'putéva sufrì:
se l'avnìva la Juve,
l'éra tött Juventèn,
se l'arvéva la Roma,
i dvantèva rumèn,
se t'avdéva di pullman
si  strissùn röss e nìr:..
l'éra quìj di Rimnìs
ch'j éra dvènt milanìs

se vinzìva e Cesèna
i masèva i strissùn
e i turnèva vérs Rémin
imbiss-cì cmè i leùn;
se par chès a pardàmi,
ch'l'è suzèst raramènt,
ta i lizìva int la fàzza
chi éra pröpi cuntènt.

Me a capéss che l'invìdia
l'è un malàzz ad chi brött
e l'è un pchè che a quìj d'Rémin
u si atécca ma tött!
Fàtt e sta chi sperèva
int la su promoziòn
e di piö i calculèva
int la retrocessiòn
de squadròn de Cesèna,
par putéz incuntrè
int un « Dèrby » arabiè
e magàri i pansèva
ad putézz atachè!...

Mo stavôlta, burdéll,
u v'dà d'vôlta la tèsta:
avì fnì d'fè i castéll
cumè ai tìmp d'Malatèsta:
un castèll a Gradèra,
un castèll a Cesèna,
e a fasìva la guèra
in pianura e in culèna!
Acsé i vòst desidìri
j è finì tött in fùm,
a sìarvénz int la CI
cumè un brènch ad quajùn,
e Cesèna l'è 'rstè
int la Seria piö grànda
e staltr'ànn s'a vlì vdé
una bèla partìda
a sì prôpi masé
d'arturnè a la Fiurìda!...

S'u v'dispìs ch'a vinzégna,
nu v'magné tött al dìdi,
no passì una gran tégna:
...Ch'a fasìva al fiss-cìdi,
ch'a biastmìva par nùn ,
u n'impôrta una màssa:
cuntì fèna a trantùn
e a vdirì che la v'passa!...